काठमाडौं । देशका विभिन्न भू–भागमा आज मौसममा आंशिकदेखि सामान्य बदली रहने मौसम पूर्वानुमान गरिएको छ। जल तथा मौसम विज्ञान विभागका अनुसार विशेषगरी कोशी, बागमती र गण्डकी प्रदेशका हिमाली तथा पहाडी क्षेत्रमा बादल लाग्ने सम्भावना रहेको छ।

भोलि दिउँसो कोशी, बागमती र गण्डकी प्रदेशका हिमाली तथा पहाडी भू–भागमा साधारणतया बादल लाग्नेछ। लुम्बिनी, कर्णाली र सुदूरपश्चिम प्रदेशका हिमाली तथा पहाडी भू–भागसहित देशका तराई क्षेत्रमा आंशिक बदली रहने पूर्वानुमान छ।

कोशी र बागमती प्रदेशका हिमाली तथा पहाडी भू–भागका थोरै स्थानमा मध्यमसम्मको वर्षा हुने सम्भावना छ। यस्तै, गण्डकी, लुम्बिनी, कर्णाली र सुदूरपश्चिम प्रदेशका पहाडी भू–भागका एक–दुई स्थानमा हल्का वर्षा हुनसक्ने विभागले जनाएको छ।

त्यसैगरी कोशी, बागमती, गण्डकी र लुम्बिनी प्रदेशका तराई भू–भागका एक–दुई स्थानमा पनि हल्का वर्षाको सम्भावना रहेको छ।

जल तथा मौसम विज्ञान विभागले मौसमसम्बन्धी अद्यावधिक सूचना तथा चेतावनीहरूका लागि आधिकारिक विवरणमा ध्यान दिन आग्रह गर्दै आएको छ। विभागको वेबसाइटमा मौसम तथा जलविज्ञानसम्बन्धी नियमित अनुगमन र पूर्वानुमान उपलब्ध गराइएको छ ।