कञ्चनपुर, असोज १४। कञ्चनपुरको दोधारा–चाँदनी नगरपालिका र भीमदत्त नगरपालिकालाई जोड्ने महाकाली नदीमाथिको प्रसिद्ध झोलुङ्गे पुल बुधबार बिहान चुँडिएको छ।
महाकाली नदीको बहाव बढेका बेला पुलको बीच भागमा रहेको एउटा पोल नदीले बगाएपछि पुलमा ठूलो क्षति पुगेको जिल्ला प्रहरी कार्यालय कञ्चनपुरले जनाएको छ। पुलको केही भाग माथि उठ्नुका साथै एउटा पिल्लरमा समेत क्षति पुगेपछि पैदल आवतजावत पूर्ण रूपमा अवरुद्ध भएको छ।

करिब १ हजार ४५२ दशमलव ९६ मिटर लामो यो पुल दोधारा–चाँदनी क्षेत्रका बासिन्दाका लागि महत्वपूर्ण आवतजावतको माध्यम हो। विभिन्न स्रोतले यसलाई एसियाकै दोस्रो लामो झोलुङ्गे पुलका रूपमा उल्लेख गरेका छन्।

क्षतिग्रस्त पुलको मर्मत तथा आवतजावत पुनः सञ्चालनका लागि सम्बन्धित निकायबाट पहल भइरहेको जनाइएको छ।

स्रोत: जिल्ला प्रहरी कार्यालय कञ्चनपुर तथा विभिन्न समाचार स्रोत