नागपञ्चमीको पावन अवसर: नागस्थानमा भक्तजनको घुइँचाे ,घर-घरमा नागको फोटो टाँसेर पूजा अर्चना

​काठमाडौँ। आज श्रावण शुक्ल पञ्चमी अर्थात् सनातन धर्मावलम्बीहरूको महान् पर्व नागपञ्चमी। नेपालभर आजका दिन घरका मूल ढोकामा नागको चित्र टाँसेर, दूध, दुबो, कुश, र तिलसहित विधिपूर्वक नागको पूजा-अर्चना गरिँदै छ।

​नागलाई पानी र नागपञ्चमीलाई वर्षाको कारक मानिने भएकाले खेतबारीको रक्षा र चट्याङ, सर्प तथा अग्निभयबाट बच्नका लागि यो पूजाको ठूलो धार्मिक तथा सांस्कृतिक महत्त्व रहेको छ।

​धार्मिक मान्यता र परम्परा

धार्मिक विश्वास अनुसार नागपञ्चमीका दिन घरको मूल ढोकामा नागको चित्र टाँस्नाले वर्षभरि घरमा सर्प, बिच्छी जस्ता विषालु जीवको डर हुँदैन भने चट्याङ परे पनि क्षति हुँदैन भन्ने जनविश्वास छ। आजका दिन नागथान तथा विभिन्न पवित्र नदी, ताल, र कुण्डहरूमा गएर नागको पूजा गर्ने परम्परा छ।

​काठमाडौँ उपत्यकाका मुख्य नागस्थानमा भक्तजनको भिड

आज बिहानैदेखि काठमाडौँ उपत्यकाका प्रसिद्ध नागदह, टौदह, नक्सालको नागपोखरी, र भक्तपुरको सिद्धपोखरीलगायत देशका विभिन्न नागस्थानहरूमा पूजाअर्चना गर्ने भक्तजनहरूको घुइँच लागेको छ। भक्तजनहरूले नागलाई दूध, गाईको घिउ, फूल, र अक्षता चढाएर सुख, शान्ति र समृद्धिको कामना गरिरहेका छन्।