ललिता सिग्देल
काठमाडौँ/ललितपुर — ॐकार टेलिभिजन र ॐकार फाउन्डेसनको आयोजना तथा दोभान विकास समितिको सहकार्यमा चतुर्मास अनुष्ठान अन्तर्गत “दोस्रो शङ्खमूल श्रावणी महोत्सव” हरिशयनी एकादशीदेखि भव्य रूपमा सञ्चालन भइरहेको छ।
विश्वकै एक मात्र १०८ फिट अग्लो त्रिशुल रहेको कालाग्निरुद्रपीठ लड्केश्वर धामको विशेष निशानिसहित सञ्चालित यस अनुष्ठानमा “नेपाल माहात्म्य प्रवचन तथा राष्ट्रिय कोटिहोम सङ्कल्प यात्रा” समेत मुख्य आकर्षणका रूपमा रहेका छन्। “ॐकारले जहाँ टेक्छ, त्यस क्षेत्रलाई विश्वले देख्छ” भन्ने मूल नाराका साथ अघि बढेको यो महोत्सव धार्मिक, सांस्कृतिक र राष्ट्रिय चेतना अभिवृद्धि गर्ने उद्देश्यले आयोजना गरिएको हो।
महोत्सवका मुख्य आकर्षणहरू:
- लड्केश्वर निशानी दर्शन: कालाग्निरुद्रपीठको पवित्र निशानिको दर्शन तथा पूजा-अर्चना।
- श्रीकृष्ण झूलन महोत्सव: धार्मिक विधिअनुसार श्रीकृष्ण झूलनको भक्तिमय वातावरण।
- ॐ कारेश्वर रुद्राभिषेक तथा त्रिवेणी गङ्गा आरती: प्रत्येक दिन विशेष रुद्राभिषेक र शङ्खमूल स्थित त्रिवेणीमा भव्य आरती।
- राष्ट्रिय चिन्तन तथा नेपाल माहात्म्य प्रवचन: धर्म, संस्कृति र राष्ट्रियताको हितका लागि विभिन्न आध्यात्मिक गुरुहरूद्वारा राष्ट्रिय चिन्तन।
- कोटिहोम धर्मरथ दर्शन: राष्ट्रिय कोटिहोम सङ्कल्प यात्राअन्तर्गत कोटिहोम धर्मरथको दर्शन गर्ने व्यवस्था।
हरिशयनी एकादशीबाट सुरु भएको यो अनुष्ठानमा सहभागी भई शिव-विष्णु आराधना, गंगा आरती तथा आध्यात्मिक लाभ लिनका लागि आयोजक (ॐकार टेलिभिजन र ॐकार फाउन्डेसन) ले सम्पूर्ण भक्तजन, श्रद्धालु तथा धर्मप्रेमी महानुभावहरूमा हार्दिक निमन्त्रणा तथा आह्वान गरेको छ।
वि.सं.२०८३ भदौ १ सोमवार ०८:३१ मा प्रकाशित
