ललिता सिग्देल
काठमाडौँ। जल तथा मौसम विज्ञान विभागका अनुसार असोज ९, १० र ११ गते नेपालका विभिन्न भू-भागमा भारी वर्षा हुने सम्भावना रहेको छ। सम्भावित बाढी र पहिरोको उच्च जोखिमलाई मध्यनजर गर्दै शिक्षा, विज्ञान तथा प्रविधि मन्त्रालयले सबै विद्यार्थी, बालबालिका, शिक्षक तथा कर्मचारीको सुरक्षालाई प्राथमिकतामा राखेर पूर्वतयारी अपनाउन आग्रह गरेको छ।
मन्त्रालयले स्थानीय तहहरूसँग समन्वय गरी असोज ८ र ९ गते आवश्यकतानुसार विद्यालयहरूमा विदा दिन अनुरोध गरेको छ। यसका साथै असोज ९ गतेदेखि ११ गतेसम्म सञ्चालन हुने गरी तोकिएका सम्पूर्ण विश्वविद्यालय तथा परीक्षा सञ्चालन गर्ने निकायहरूलाई परिस्थितिको मूल्याङ्कन गरी आवश्यकतानुसार परीक्षा कार्यक्रमहरू स्थगित गर्न निर्देशन दिइएको छ।
विपदका बेला सुरक्षित रहेका विद्यालय भवनहरूलाई आवश्यकता परेमा अस्थायी आश्रयस्थलको रूपमा प्रयोग गर्न दिने व्यवस्था मिलाउन पनि मन्त्रालयले सबै सरोकारवालालाई सूचित गरेको छ।
यसैगरी, मन्त्रालयले सम्भावित दुर्घटनाबाट जोगाउन अभिभावकहरूलाई आफ्ना बालबालिकालाई नदी, खोला, पोखरी तथा पहिरोको जोखिम भएका खतरायुक्त स्थानमा जान नदिन र उच्च सतर्कता अपनाउन विशेष अपिल गरेको छ।
वि.सं.२०८३ असोज ८ बिहीवार ११:४५ मा प्रकाशित
