दाङ । शिक्षा तथा खेलकुदमन्त्री सस्मित पोखरेलले दाङको देउखुरीमा रहेको अन्तर्राष्ट्रिय क्रिकेट रङ्गशालाको स्थलगत निरीक्षण गरेका छन्।

दसौँ राष्ट्रिय खेलकुद प्रतियोगितासम्बन्धी कार्यक्रममा सहभागी हुन सुर्खेततर्फ जाने क्रममा मन्त्री पोखरेल आइतबार देउखुरी पुगेका हुन्। उनले रङ्गशालाको अवस्था तथा त्यहाँ भइरहेको खेल गतिविधिबारे जानकारी लिएका थिए।

रङ्गशालामा क्रिकेट अभ्यास गरिरहेका युवाहरूसँग भेटेका मन्त्री पोखरेलले उनीहरूसँग खेलकुदका विषयमा कुराकानीसमेत गरे। त्यसक्रममा उनले अभ्यासरत युवाहरूसँग केही समय क्रिकेट खेलेका थिए।

मन्त्री पोखरेलको निरीक्षणका क्रममा रङ्गशालामा भइरहेको अभ्यास, खेलाडीको गतिविधि तथा खेलकुद पूर्वाधारको अवस्थाबारे जानकारी लिइएको जनाइएको छ।

राष्ट्रिय खेलकुद प्रतियोगिताको तयारी भइरहेका बेला मन्त्रीको देउखुरी क्रिकेट रङ्गशाला भ्रमण भएको हो।