हुम्ला । हिमपातका कारण हुम्लाको उत्तरी क्षेत्रमा पर्ने लिमी–हिल्सा सडक अवरुद्ध भएको छ। सडकमा साढे तीन फिटसम्म हिउँ जम्दा स्थानीयको आवतजावत प्रभावित हुनुका साथै हिल्सास्थित प्रहरी चौकीको नियमित कामकाजमा समेत कठिनाइ भएको छ।

असोज पहिलो सातादेखि नै लिमी र हिल्सा क्षेत्रमा लगातार हिमपात भएपछि सडकमा बाक्लो हिउँ थुप्रिएको हो। हिउँ नपन्छाइएका कारण सडकबाट सवारीसाधन सञ्चालन हुन सकेका छैनन् भने पैदल हिँड्नसमेत कठिन अवस्था बनेको छ।

हिमपातसँगै अत्यधिक चिसो बढेपछि स्थानीयको दैनिक जनजीवन प्रभावित भएको छ। विशेषगरी अत्यावश्यक कामका लागि आवतजावत गर्नुपर्ने तथा दैनिक उपभोग्य सामग्री ओसारपसार गर्नुपर्ने अवस्थामा समस्या देखिएको छ।

सीमावर्ती हिल्सा क्षेत्रमा रहेको प्रहरी चौकी पनि हिमपातबाट प्रभावित भएको छ। बाक्लो हिउँका कारण चौकी आसपासको आवागमनमा समस्या भएपछि सुरक्षाकर्मीलाई नियमित गतिविधि सञ्चालन गर्न चुनौती थपिएको छ।

उच्च हिमाली क्षेत्रमा पर्ने लिमी र हिल्सामा हिउँदको समयमा हिमपात हुने गरे पनि अहिले सडकमा ठूलो मात्रामा हिउँ जमेकाले यातायात सञ्चालनमा समस्या आएको हो। सडक अवरुद्ध हुँदा स्थानीयलाई आवश्यक सामग्री तथा सेवाको पहुँचमा समेत असर पर्न सक्ने अवस्था छ।

सडकमा जमेको हिउँ समयमै हटाउन नसकिए आवागमन थप प्रभावित हुने देखिएको छ। स्थानीयले सडक खुलाउन सम्बन्धित निकायबाट आवश्यक पहल गर्न माग गरेका छन्।