वासिङ्टन डीसी । अमेरिकामा डिजेलको मूल्य बढेपछि राष्ट्रपति डोनाल्ड ट्रम्पले इन्धनको लागत घटाउने उद्देश्यले नयाँ निर्णय गरेका छन्।

ट्रम्पले सोमबार कार्यकारी आदेश जारी गर्दै कृषि तथा निर्माणजस्ता ‘अफ-रोड’ प्रयोजनका लागि प्रयोग हुँदै आएको करमुक्त रातो रङको डिजेल अर्थात् ‘रेड डाइड डिजेल’ राजमार्गमा समेत प्रयोग गर्न दिने व्यवस्था गरेका हुन्।

यसअघि यस्तो डिजेल मुख्यतः राजमार्गबाहेकका क्षेत्रमा प्रयोग हुँदै आएको थियो। कर छुट पाउने भएकाले ‘रेड डाइड डिजेल’ सामान्य डिजेलको तुलनामा सस्तो पर्ने गर्छ।

नयाँ व्यवस्थाअनुसार करमुक्त डिजेलमा लाग्ने संघीय इन्धन कर वर्षको अन्त्यसम्मका लागि स्थगित गरिनेछ। अमेरिकी प्रशासनले यसबाट ट्रक चालक, किसान तथा इन्धनको बढ्दो लागतबाट प्रभावित अन्य उपभोक्तालाई राहत पुग्ने अपेक्षा गरेको छ।

अमेरिकामा पछिल्लो समय डिजेलको मूल्य उच्च बनेको छ। विश्वव्यापी इन्धन आपूर्तिमा देखिएको अवरोध तथा रिफाइनरी सञ्चालनमा परेको असरका कारण डिजेलको मूल्य बढेको बताइएको छ।

‘रेड डाइड डिजेल’ र सामान्य डिजेल रासायनिक रूपमा उस्तै भए पनि कर छुट पाएको इन्धन पहिचान गर्न यसमा रातो रङ मिसाइन्छ। यस्तो इन्धनमा राजमार्ग इन्धन कर नलाग्ने भएकाले यसको लागत कम हुन्छ।

ट्रम्प प्रशासनले नयाँ निर्णयले डिजेलको मूल्य घटाउन सहयोग पुग्ने दाबी गरेको छ। यद्यपि, ऊर्जा बजारका जानकारहरूले कर छुटले केही राहत दिए पनि विश्व बजारमा आपूर्ति तथा प्रशोधनसम्बन्धी समस्या समाधान नभएसम्म डिजेलको मूल्यमा ठूलो गिरावट आउन कठिन हुन सक्ने बताएका छन्।

डिजेलको मूल्य नियन्त्रणका लागि अमेरिकाले यसअघि सहयोगी राष्ट्रहरूसँग आपत्कालीन इन्धन भण्डारबाट तेल तथा डिजेल बजारमा ल्याउन पनि पहल गरेको थियो।

ट्रम्पको पछिल्लो निर्णयलाई अमेरिकामा बढ्दो डिजेल लागत घटाउने तथा यातायात र कृषि क्षेत्रमा पर्ने इन्धन खर्च कम गर्ने प्रयासका रूपमा हेरिएको छ।