काठमाडौं । बंगालको खाडीमा विकसित चक्रवात ‘अर्नब’ कमजोर भएर न्यून चापीय प्रणालीमा परिणत भएपछि नेपालमा शक्तिशाली हावाहुरी चल्ने सम्भावना घटेको मौसमविद्हरूले बताएका छन्। यद्यपि, यसको प्रभावका कारण देशका विभिन्न स्थानमा वर्षा र उच्च पहाडी तथा हिमाली क्षेत्रमा हिमपातको सम्भावना कायमै छ।

मौसम पूर्वानुमान महाशाखाका अनुसार चक्रवात कमजोर हुँदै गए पनि त्यसबाट उत्पन्न मौसमी प्रणालीले नेपालको मौसममा प्रभाव पार्न सक्छ। वरिष्ठ मौसमविद् विभूति पोखरेलका अनुसार चक्रवात शक्तिशाली अवस्थामा रहँदा अनुमान गरिएको जस्तो तीव्र हावाहुरीको सम्भावना अहिले कम देखिएको छ। तर, वर्षाको अवस्थाबारे सतर्क रहन आवश्यक छ।

महाशाखाले सार्वजनिक गरेको पूर्वानुमानबारे बिहीबार चक्रवात कमजोर भएर न्यून चापीय प्रणालीमा परिणत भए पनि बिहीबार दिउँसोदेखि वर्षा सुरु हुन सक्ने र बिहीबार राति तथा शुक्रबार केही स्थानमा भारी वर्षाको जोखिम रहन सक्छ।

कोशी, मधेश, बागमती, गण्डकी र लुम्बिनी प्रदेशका विभिन्न स्थानमा मेघगर्जन र चट्याङसहित वर्षा हुन सक्ने सम्भावना छ। कर्णाली र सुदूरपश्चिमका केही क्षेत्रमा पनि वर्षा तथा हिमपात हुन सक्ने पूर्वानुमान गरिएको छ। उच्च पहाडी तथा हिमाली क्षेत्रमा हिमपात, हिमआँधी र हिमपहिरोको जोखिमसमेत रहन सक्छ।

चक्रवात कमजोर हुँदैमा त्यसको मौसमी प्रभाव तत्काल समाप्त नहुने भएकाले वर्षाको मात्रा र क्षेत्रफलमा परिवर्तन हुन सक्ने मौसमविद्हरूले बताएका छन्। सम्भावित वर्षाले सडक यातायात, हवाई उडान, कृषि कार्य तथा दैनिक जनजीवनमा असर पार्न सक्ने भएकाले मौसमसम्बन्धी आधिकारिक सूचना नियमित रूपमा हेर्न आग्रह गरिएको छ।