काभ्रेपलाञ्चोक। काभ्रेपलाञ्चोकको बेथानचोक गाउँपालिका–४ स्थित खहरेखोलामा शनिबार बिहान अविरल वर्षासँगै ग्राभेलसहितको लेदो माटो बग्दा घर तथा गोठमा क्षति पुगेको छ। घटनामा एक घर पुरिएको छ भने दुई घरमा लेदो माटोसहितको पानी पसेको छ। एउटा गोठ पूर्ण रूपमा क्षतिग्रस्त भएको छ।

प्रहरीका अनुसार शनिबार बिहान करिब ८:४० बजे भएको घटनामा स्थानीय शेरबहादुर तामाङको ढुङ्गा–माटोले बनेको जस्ताको छानो भएको एकतले घर लेदो माटोले पुरिएको हो। घरको जस्ता मात्र देखिने अवस्थामा पुगेको प्रहरीले जनाएको छ।

त्यस्तै, उक्त घरनजिकै रहेको ढुङ्गा–माटोले बनेको जस्ताको छानो भएको तीनतले घरमा लेदो माटोसहितको पानी पसेको छ। सोही स्थानका अर्का स्थानीय हर्कबहादुर तामाङको तीनतले घरमा पनि लेदो माटोसहितको पानी पसेको छ। उनको घरनजिकै रहेको जस्तापाता र काठले बनेको गोठ पूर्ण रूपमा क्षतिग्रस्त भएको प्रहरीले जनाएको छ।

घटनाको जानकारी प्राप्त हुनासाथ प्रहरी चौकी खोपासीबाट प्रहरी टोली घटनास्थलमा खटिएको थियो। प्रहरीले दुवै परिवारका आठ–आठ जना गरी १६ जनालाई सुरक्षित स्थानमा सारेर आफन्तको घरमा राखेको जनाएको छ।

घटनामा मानवीय तथा चौपायाको क्षति भएको छैन। समयमै प्रभावित परिवारलाई सुरक्षित स्थानमा सारिएकाले थप मानवीय जोखिम टरेको छ।

अविरल वर्षाका कारण खोलानाला आसपास तथा पहिरोको जोखिम भएका क्षेत्रमा थप विपद् निम्तिन सक्ने भएकाले स्थानीयवासीलाई सतर्क रहन आग्रह गरिएको छ। जोखिमयुक्त क्षेत्रमा बसोबास गर्ने नागरिकले आवश्यक सावधानी अपनाउन र सम्भावित जोखिम देखिए सुरक्षित स्थानमा जानुपर्ने देखिन्छ।

विपद्का कारण घरबार तथा भौतिक संरचनामा क्षति पुगेका परिवारको सुरक्षित बसोबास र आवश्यक राहत व्यवस्थापनमा सम्बन्धित निकायको ध्यान जान आवश्यक छ।