काठमाडौं । बृहस्पति ग्रहको अतिचारी अवस्थासँग सम्बन्धित ज्योतिषीय मान्यताअनुसार सम्भावित नकारात्मक प्रभावको शान्ति तथा विश्वकल्याणको मंगलकामनासहित कालाग्निरुद्रपीठ लड्केश्वर धामका पीठाधीश मुकुन्द शर्मा हुमागाईं रुद्र आराधनाका लागि गोसाइँकुण्ड प्रस्थान गर्नु भएको छ ।

विश्वशान्ति राष्ट्रिय कोटिहोम २०८३ को संकल्पको सातौँ दिन कालाग्निरुद्रपीठ लड्केश्वर धामका पीठाधीश मुकुन्द शर्मा हुमागाईं आफ्ना माता, पिता र भाइका साथ आज हेलिकप्टरमार्फत रसुवास्थित पवित्र तीर्थस्थल गोसाइँकुण्ड प्रस्थान गर्नुभएको हो ।

आगामी माघ शुक्ल पञ्चमीदेखि आयोजना गर्ने संकल्प गरिएको ‘विश्वशान्ति राष्ट्रिय कोटिहोम २०८३’ को सातौँ दिन आज उहाले गोसाइँकुण्ड पुगेर भगवान् रुद्रको आराधना गर्ने बताउनु भएकाे हाे ।

उहाले सामाजिक सञ्जालमार्फत कालाग्निरुद्रपीठ लड्केश्वर बाबाको कृपा सबैमा रहोस् भन्ने कामनासहित श्रद्धालुहरूलाई आफ्नो गोत्र उल्लेख गर्नसमेत आग्रह गर्नु भएको छ ।

सनातन धर्ममा भगवान् रुद्रको आराधनालाई शान्ति, कल्याण र आध्यात्मिक साधनासँग जोडेर हेर्ने धार्मिक परम्परा छ। हुमागाईंको यो यात्रा पनि विश्वशान्ति, राष्ट्रकल्याण तथा आध्यात्मिक जागरणको संकल्पसँग जोडिएको छ।