असोज, चितवन । बागमती प्रदेश सरकारले भोटेगण्डकी तथा त्रिशूली नदी प्रणालीमा आएको बाढीबाट प्रभावित जिल्लामा पुनर्निर्माण तथा पुनर्स्थापनाको कामलाई प्राथमिकताका साथ अघि बढाउने भएको छ।

प्रदेशका विभिन्न जिल्लामा बाढीका कारण जनधनसँगै सडक, खानेपानी, स्वास्थ्य पूर्वाधारलगायत भौतिक संरचनामा क्षति पुगेपछि पुनर्निर्माणतर्फ सरकार केन्द्रित भएको हो। मुख्यमन्त्री किरण थापामगरले विपद् प्रभावित क्षेत्रको पुनर्निर्माण र पुनर्स्थापनालाई प्रदेश सरकारको प्रमुख प्राथमिकतामा राखिएको बताएका छन्।

मुख्यमन्त्री थापामगरले यसअघि चितवनमा आयोजित स्थानीय तहसँगको समीक्षा कार्यक्रममा बागमती प्रदेशका १५ वटा पालिका बाढीबाट प्रभावित भएको जानकारी दिँदै प्रभावित क्षेत्रको पुनर्निर्माणमा सबै स्थानीय तहले आ–आफ्नो ठाउँबाट सहयोग गर्नुपर्ने बताएका थिए। उनका अनुसार प्रभावित क्षेत्रको पुनर्निर्माणका लागि प्रदेशका अन्य पालिकासँग समेत सहकार्य र सहयोगको अपेक्षा गरिएको छ।

प्रभावित नागरिकलाई अस्थायी बसोबासको व्यवस्था मिलाएपछि क्षतिग्रस्त भौतिक पूर्वाधार निर्माण, खानेपानी, स्वास्थ्यचौकी तथा अस्पताललगायत संरचनाको पुनर्निर्माणमा तीनै तहका सरकारबीच समन्वय गरेर काम अघि बढाउने प्रदेश सरकारको तयारी छ।

बाढी तथा विपद्का कारण प्रभावित परिवारको पीडामा प्रदेश सरकार साथमा रहेको उल्लेख गर्दै मुख्यमन्त्री थापामगरले पुनर्निर्माणको अभियानमा स्थानीय तहको सक्रिय सहभागिता आवश्यक रहेको बताएका छन्।

प्रदेश सरकारले विपद् प्रभावित क्षेत्रको पुनर्निर्माणसँगै नागरिकको सुरक्षित बसोबास र जीविकोपार्जन पुनःस्थापनालाई समेत प्राथमिकतामा राख्ने जनाएको छ।