एजेन्सी । यमनमा सक्रिय हूथी विद्रोही समूहले साउदी अरबको राजधानी रियादस्थित अराम्कोको एक ऊर्जा केन्द्रमा क्षेप्यास्त्र र ड्रोनमार्फत हमला गरेको दाबी गरेको छ।

हूथी सैन्य प्रवक्ता याह्या सारीले शनिबार सार्वजनिक गरेको वक्तव्यमा साउदी अरबको सरकारी तेल कम्पनी अराम्कोको केन्द्रलाई लक्षित गरी ब्यालिस्टिक मिसाइल र ड्रोन प्रयोग गरिएको बताएका छन्। उनका अनुसार आक्रमणका कारण लक्षित क्षेत्रमा आगलागी भएको थियो।

अन्तर्राष्ट्रिय सञ्चारमाध्यमका अनुसार रियादको दक्षिणी क्षेत्रमा रहेको अराम्कोको एक सुविधानजिक शनिबार ठूलो धुवाँ र आगो देखिएको थियो। घटनास्थलतर्फ अग्निनियन्त्रक, एम्बुलेन्स तथा सुरक्षाकर्मी पुगेका तस्बिर तथा विवरणसमेत सार्वजनिक भएका छन्।

तर हूथी समूहको दाबीलाई साउदी अधिकारीहरूले तत्काल पुष्टि गरेका छैनन्। साउदी नेतृत्वको गठबन्धनका प्रवक्ता तुर्की अल–मलिकीले रियादस्थित अराम्को केन्द्रमा हमला गरिएको भन्ने हूथी दाबीलाई भ्रामक भन्दै अस्वीकार गरेका छन्। अराम्कोले भने आगलागीको कारणबारे तत्काल कुनै आधिकारिक प्रतिक्रिया दिएको छैन।

हूथी पक्षले यो कारबाहीलाई यमनका राजधानी साना तथा अन्य क्षेत्रमा भएका साउदी नेतृत्वको हवाई हमलाको प्रतिक्रियाका रूपमा प्रस्तुत गरेको छ। पछिल्ला दिनमा यमनका हूथी र साउदी नेतृत्वको गठबन्धनबीच तनाव बढ्दै गएपछि साउदीका ऊर्जा पूर्वाधारहरू पनि निशानामा पर्न थालेका छन्।

यसअघि पनि हूथी समूहले साउदी अरबको यान्बु क्षेत्रमा रहेका अराम्कोका संरचनामाथि मिसाइल र ड्रोन प्रहार गरेको दाबी गरेको थियो। त्यसबेला साउदी पक्षले यान्बु र ताइफतर्फ प्रहार गरिएका ब्यालिस्टिक मिसाइलमध्ये छ वटा रोकिएको जनाएको थियो भने अराम्कोका संरचनामा क्षति पुगेको पुष्टि गरेको थिएन।

रियादस्थित पछिल्लो घटनामा भने हूथीको हमला दाबी र साउदी पक्षको खण्डनबीच घटनाको वास्तविक क्षतिको विवरण अझै स्पष्ट हुन बाँकी छ।