बुटवल । रुपन्देहीको देवदहमा पेस्तोलबाट गोली चलेको घटनामा एक युवक घाइते भएका छन्। घटनापछि प्रहरीले गोली चलाएको आरोप लागेका व्यक्तिसहित तीन जनालाई नियन्त्रणमा लिएको छ।

प्रहरीका अनुसार देवदह नगरपालिका–५ मितेरी गाउँका ४२ वर्षीय दीपक खरेल भनिने दुर्गाप्रसाद खरेलले समातेको पेस्तोलबाट एक राउन्ड गोली चलेको थियो। गोली लागेर बुटवल उपमहानगरपालिका–९ मिलनचोकका २२ वर्षीय रायन खत्री क्षेत्री घाइते भएका छन्।

घटना शनिबार असोज १७ गते अपराह्न पौने ४ बजेतिर भएको हो। प्रहरीका अनुसार पेस्तोल देखाउने क्रममा गोली चलेको प्रारम्भिक अनुसन्धानबाट खुलेको छ।

घाइते खत्रीको देवदह मेडिकल कलेज, भलुहीमा उपचार भइरहेको छ। उनको अवस्था सामान्य रहेको जिल्ला प्रहरी कार्यालय रुपन्देहीले जनाएको छ।

घटनाको सूचना पाएपछि खैरेनी प्रहरी चौकीबाट खटिएको टोलीले खरेलसहित कमल शर्मा र अमृत खरेललाई नियन्त्रणमा लिएको हो।

प्रहरीले खरेलको साथबाट एक थान पेस्तोल र दुई राउन्ड गोली समेत बरामद गरेको जनाएको छ। घटनाको कारण तथा अन्य पक्षबारे थप अनुसन्धान भइरहेको जिल्ला प्रहरी कार्यालय रुपन्देहीका सूचना अधिकारी डीएसपी कृष्णकुमार चन्दले जानकारी दिएका छन्।