काठमाडौं ।बंगालको खाडीको पश्चिम–मध्य तथा उत्तर–पश्चिम क्षेत्रमा विकसित भएको न्यूनचापीय प्रणाली गहिरो न्यूनचापीय प्रणालीमा परिणत भएको छ। भारतीय मौसम विभागका अनुसार यो प्रणाली पश्चिम–उत्तरपश्चिमतर्फ सर्दै आज राति विशाखापट्टनमदेखि गोपालपुरबीचको उत्तर आन्ध्र प्रदेश–दक्षिण ओडिशा तट पार गर्ने सम्भावना छ।

यस मौसम प्रणालीको प्रभावसँगै नेपालमा पनि वर्षा गतिविधि बढ्न थालेको मौसम पूर्वानुमान महाशाखाले जनाएको छ। काठमाडौं उपत्यकासहित विभिन्न क्षेत्रमा बदली र वर्षा भइरहेको छ भने आगामी दिनमा वर्षा अझ बढ्न सक्ने पूर्वानुमान गरिएको छ।

नेपालमा सेप्टेम्बर २४ देखि २८ सम्म वर्षा बढ्ने सम्भावना रहेको र कतिपय प्रदेशमा भारीदेखि धेरै भारी वर्षा हुनसक्ने पूर्वानुमान छ। विशेषगरी नदी तथा खोलानालामा पानीको बहाव बढ्ने, पहाडी क्षेत्रमा पहिरो तथा कटानको जोखिम बढ्ने भएकाले सतर्कता अपनाउन मौसमविद्हरूले आग्रह गरेका छन्।