काठमाडौं । काठमाडौँ उपत्यका ट्राफिक प्रहरीले लामो दूरीमा सञ्चालन हुने रात्रिकालीन सार्वजनिक सवारीसाधनमा दुई जना चालक अनिवार्य राख्ने नियमलाई कडाइका साथ लागू गर्ने भएको छ।
रात्रिकालीन यात्राका क्रममा चालकलाई अत्यधिक थकान हुन नदिन तथा सम्भावित सडक दुर्घटना न्यूनीकरण गर्ने उद्देश्यले यस्तो व्यवस्था कार्यान्वयनमा ल्याउन लागिएको ट्राफिक प्रहरीले जनाएको छ।
काठमाडौँ उपत्यका ट्राफिक प्रहरीका प्रवक्ताका अनुसार लामो दूरीमा रातको समयमा सञ्चालन हुने सार्वजनिक सवारीमा दुई चालकको व्यवस्था भएमा आवश्यकताअनुसार चालक परिवर्तन गरी यात्रा सञ्चालन गर्न सकिनेछ। यसले चालकको थकान कम गर्नुका साथै यात्रु तथा सडक सुरक्षामा समेत सहयोग पुग्ने अपेक्षा गरिएको छ।
ट्राफिक प्रहरीले नियम पालना नगर्ने सार्वजनिक सवारीसाधनमाथि आवश्यक कारबाही गर्ने जनाएको छ।