omkar tv
काठमाडौं । राष्ट्रिय स्वतन्त्र पार्टी (रास्वपा) की सांसद इन्दिरा राना मगरले झापाका नागरिकले जंगली हात्तीको त्रास र सुकुमवासी समस्याका कारण भोग्नुपरेको कठिनाइ प्रति सरकारको ध्यानाकर्षण गराएकी छन्।
प्रतिनिधिसभाको शुक्रबार बसेको बैठकमा बोल्दै सांसद रानाले हात्तीबाट हुने क्षति नियन्त्रण गर्न र भूमिसम्बन्धी समस्या समाधान गर्न सरकारसँग तत्काल प्रभावकारी कदम चाल्न माग गरेकी हुन्।
उनका अनुसार बाली भित्र्याउने समयमा जंगली हात्तीले पुर्याउने क्षतिले किसानहरू प्रभावित भइरहेका छन्। हात्तीको आक्रमण र बाली नष्ट हुने समस्याबाट स्थानीय बासिन्दालाई जोगाउन आवश्यक सुरक्षा तथा नियन्त्रणका उपाय अपनाउन उनले सरकारको ध्यानाकर्षण गराइन्।
त्यसैगरी, झापामा लामो समयदेखि सुकुमवासी समस्यासँग जुधिरहेका नागरिकलाई जग्गाको स्वामित्व प्रदान गर्ने प्रक्रिया अघि बढाउनुपर्नेमा उनले जोड दिइन्। जग्गाको निस्सा प्राप्त गरिसकेका नागरिकलाई समेत लालपुर्जा उपलब्ध गराउन ढिलाइ गर्न नहुने उनको माग छ।
सांसद रानाले स्थानीय नागरिकका समस्या समाधानका लागि सरकारले आवश्यक पहल गर्नुपर्ने बताएकी छन्। हात्तीबाट हुने क्षति नियन्त्रण र भूमिहीन नागरिकलाई जग्गाको स्वामित्व उपलब्ध गराउने विषयलाई प्राथमिकतामा राख्नुपर्ने उनको भनाइ छ।
झापामा जंगली हात्तीबाट हुने क्षति नियन्त्रण तथा सुकुमवासी समस्या समाधानका लागि सरकारी निकायबाट प्रभावकारी कदम चाल्नुपर्ने विषय सांसद रानाले संसद्मार्फत उठाएकी हुन्।
वि.सं.२०८३ असोज १६ शुक्रवार १५:२१ मा प्रकाशित
