ताप्लेजुङ। ताप्लेजुङको दोभान बजारमा विद्युत् सर्ट भएर आगलागी हुँदा ७ वटा घर जलेर पूर्णरूपमा नष्ट भएका छन्।
जिल्ला प्रशासन कार्यालय, ताप्लेजुङका अनुसार विद्युत् सर्टका कारण लागेको आगोबाट बजार क्षेत्रका घरहरूमा क्षति पुगेको हो। आगलागीबाट घर तथा घरभित्र रहेका विभिन्न सामग्री जलेर नष्ट भएका छन्।
आगलागीबाट मानवीय क्षति भए–नभएको तथा क्षतिको विस्तृत विवरण संकलन भइरहेको जनाइएको छ। घटनापछि स्थानीयवासी, सुरक्षाकर्मी तथा सम्बन्धित निकायको समन्वयमा आगो नियन्त्रण तथा राहत व्यवस्थापनको काम अघि बढाइएको छ।
आगलागीबाट प्रभावित परिवारलाई तत्काल आवश्यक सहयोग तथा पुनःस्थापनाका लागि स्थानीय प्रशासन र सम्बन्धित निकायले समन्वय गरिरहेका छन्।